Weeklikse Wonders #3

Hier is my lys van Weeklikse Wonders!

Dit kan enigiets insluit: ‘n oulike ontdekking, ‘n ongelooflike ervaring of net die genot van alledaagse dingetjies in die lewe! Die verantwoordelikheid is op ons skouers om die mooi in die alledaagse te vind, of selfs die mooi in die lelike dae te vind. Dis ons eie verantwoordelikheid om skoonheid en inspirasie te vind in dinge wat vreemd of onvolmaak voorkom (dis juis in hierdie goed wat die interessante kant van die lewe lê!). Ons moet ons oë oophou om die vreugde in onverwagse dinge te vind sodat ons kan leer om te waardeer wat ons het. Dit is dan ook ‘n uitdaging om die mooi dinge in jou week raak te sien en te waardeer! 🙂

So kom ons kry eers die olifant uit die pad… Ja, ek het baie lanklaas iets neergepen en hierdie weeklikse wonders is ‘n hele paar weke overdue! Maar ek was vir ‘n rukkie oorsee, sonder internet en met te veel om te ervaar om stil te raak en te skryf. Daarom is hierdie blog meer ‘n Monthly Musings as enigiets anders.

1. Troues

Jip. My eerste weeklikse wonder is die wonder van ‘n huwelikserimonie. Ek beleef tans my kwarteeu en dus het ek troues omtrent elke tweede naweek. Alhoewel my beursie bietjie swaarkry, kla my hart nie. Met elke troue besef ek net daar is min dinge wat by ‘n troudag kan kers vashou. Daar is iets heiligs aan twee mense wat in die teenwoordigheid van vriende en familie voor hulle Skepper beloof om mekaar lief te hê soos Hy ons lief het. Elkeen van die troues wat ek al bygewoon het was anders in dekor, musiek, mense, venue, tradisies ens. ens., maar dieselfde in die besondere opsigte dat dit ‘n dag vol vars vreugde en vrolike feesvieringe was. Soos ‘n vriend van my sê, jy hoef niks te doen nie, maar jy stap doodgelukkig daar uit.

2. Amsterdam

Dalk was dit my Hollandse bloed of my liefde vir Nederlandse poësie. Dalk was dit die mooi, warm weer of die uitstekende geselskap. Dalk was dit die bitterballen en biertjes, of die Indonesian Cuisine. Dalk was dit ‘n stukkie solidariteit met Rembrandt en Van Gogh, of met geskiedenis en Anne Frank. Dalk was dit die onvergeetlike Heineken Experience of die ongelooflike Rijksmuseum. Dalk was dit die mense, die atmosfeer, die kultuur, die tulpe. Hoe dit ook al sy, Amsterdam het my hart gesteel.

“Hier is altijd mooier dan daar

Nu altijd belangrijker dan

Gister-straks-of-volgend-jaar”

3. Josh Groban se “Stages”

Wanneer jou pa jou so goed ken en die beste CD koop, dan word dit een van my weeklikse wonders. Al die snitte op die CD is afkomstig van een of ander uitstekende musiekblyspel. Ek is klein bietjie verslaaf op die oomblik. Maar kombineer my gunsteling sanger en my gunsteling musiekblyspel en dan kry jy my nuwe op “repeat” liedjie:

4. Girl with Cake

Wanneer jy met weerlose populasies werk, kom daar tye wanneer jy hoop in die mensdom verloor. Ek het juis so ‘n tydperk van wanhopigheid en frustrasie beleef toe iemand my na hierdie ongelooflike vrou se Instagram-account verwys. Op haar webtuiste kan jy die volle verhaal lees, maar basies maak sy pragmooie en heerlike koeke en deel dit uit aan iemand wat lyk asof hulle ‘n bietjie vreugde in hulle lewe benodig. Haar leuse is juis, Share the Love in Every City. Spread the love in your community – no matter how you choose to do it. En is dit nie immers soms al wat mens kan doen, maar ook al wat partykeer nodig is nie?  Deel net liefde uit, maak nie saak hoe liefdeloos die lewe vir jou begin lyk nie. Soos met die seester storie, maak jy dan ten minste ‘n verskil in een persoon se lewe. Raak jy ten minste een persoon aan. Wys jy ten minste vir een persoon dat hulle die moeite werd is om liefde te ontvang. Met elke liefdesdaad wat jy vir die (soms donker) wêreld wys, kom daar ‘n klein bietjie meer lig.

5. Bottomless Coffee en reën

As jy nog nie van hierdie band gehoor het nie, dan mis jy uit! Ek ken vir Lourens en Esté, die band members van Bottomless Coffee, sedert 2010. Dit was die jaar wat hulle verlief geraak het, aangehelp deur ‘n groot shared liefde vir musiek. Om te sê hierdie getroude, dinamiese duo is musikaal, is ‘n totale eufemisme. Ek het die voorreg gehad om een van hulle shows die afgelope week te gaan kyk in Die Boer en ekt net weer besef dat hulle absoluut fenominaal is. Tussen die twee van hulle, speel hulle ag instrumente, wat maak dat hierdie tweetjies ‘n volledige band vorm. Die hoof rede dat hulle hierdie week op my weeklikse wonders is, is oor ‘n nuwe liedjie wat hulle by Die Boer opgevoer het. Die lirieke sê basies dat liefde goed doen in die son, maar dit benodig wel die reën. Dit is juis wat ek met hierdie weeklikse wonders probeer doen. Ek wil die mooi in die lewe vind, al moet mens sukkel om dit te kry. Reëntye het ‘n ander tipe skoonheid daaraan gekoppel. Ja, die weer is nie perfek nie, maar dit was alles skoon en bring selfs ‘n reënboog vol beloftes daarmee saam. Ek was die laaste week gebombardeer met die seer van die wêreld en dan begin mens twyfel of jy met jou een seesterretjie ‘n verskil maak. Tog, ek glo ons moet aandag gee aan dit wat ons harte breek, want die kanse is goed dat dit is waar die Hemelse Vader wil hê ons moet dien. Dan moet jy begin vertrou op sy getrouheid en sy genade, al reën dit en die son voel ver.

Gaan loer gerus op Bottomless Coffee band se webtuiste!

Wat het vir julle uitgestaan hierdie afgelope week wat verby is? Wat was die reën en wat was die wonders?

Credit